Monday 29 April 2013

లాస్య రామకృష్ణ తో కష్టేఫలే గారి ఇంటర్వ్యూ







పేరు:- "పుట్టినప్పటినుంచి పేరొకలా ఏడిచిందా? చిన్నప్పుడు, గిర్రడని, ఆతర్వాత గిరీశమని, గీరీశంగారని" గురజాడ వారన్నట్లు నాకు ఒక పేరు కాదమ్మాయ్! రెండు పేర్లు. పెద్ద కధే ఉంది మరి, చెప్పమన్నావా?  ఒక పేరు కన్నమ్మ పెట్టింది, పెంచుకున్నమ్మ పొద్దుచూసేది, చూడలేక నాకు ’భాస్కరశర్మ’ అని పేరు కన్నమ్మ చేత  పెట్టించి, తనుపొద్దు చూడటం మానేసిందిట. అలా మొదటిపేరు కన్నమ్మ పెట్టినా అది పెంచుకున్నమ్మ ఆలోచనే. ఆ తరవాత పద్నాలుగో సంవత్సరం లో పెంచుకున్నమ్మ పుట్టినప్పుడు తను పెట్టించిన పేరు మార్చేసి ’వేంకట దీక్షితులు’ అని మళ్ళీ నామ కరణం చేసింది. రెండు పేర్లూ చెప్పుకుంటాను. అప్పటికే బడిలో పుట్టినప్పటి పేరు రాసేయడం తో ఆ రోజులలో మార్పులు చేసేసావకాశం లేక మొదటి పేరుతో మిగిలిపోయా.

మీ ఊరు:- ప్రస్తుతం తూ.గో.జి లో అనపర్తి. రాజమంద్రికి ముఫ్ఫయి కి.మి. దూరం. చెన్నై-కలకత్తా మెయిన్ లైన్ మీద ఉన్నది,

స్వస్థలం;- నావన్నీ రెండేనమ్మా! పొరపాటు పడకేం ఇల్లాలు మాత్రం ఒకత్తే. :)
పుట్టింది గూటాల, ప.గో.జిలో పోలవరం దగ్గర పల్లెటూరు. పెరిగింది, మరో పల్లెటూరు, తూ.గో.జిలో దుళ్ళ, రాజమంద్రికి పదిహేనుకిలోమీటర్లు దూరం. మొత్తానికి గో.జి.లు నా పుట్టిన ఊళ్ళు.

హాబీస్:- మాకు దొరకనివి పుస్తకాలు. ’పుస్తకం ఉంటే చాలు మీకు తిండీ నీళ్ళూ అక్కరలేదు, మేమున్నామో లేదో కూడా చూడరు, అందులో ములిగిపోతారం’టుంది ఇల్లాలు. ఈ మధ్య కొత్తగా బ్లాగు రాయడం,ఫోటో లు తీయడం.

పుట్టిన రోజు:- కార్తీక బహుళ పాడ్యమి,(నవంబరు నాలుగు) విజయదశమి (అక్టోబర్ ౨౫, నేను రెండు సార్లు పుట్టేను కదా)

అభిమాన రచయిత:- శ్రీ శ్రీపాద సుబ్రహ్మణ్య శాస్త్రి, శ్రీ రాచకొండ విశ్వనాధ శాస్త్రి.

నచ్చే రంగు;- తెలుపు, బంగారు వర్ణం.

నచ్చేసినిమా:- సినిమాలు చూసి నలభయి ఏళ్ళయిందేమో! మాయాబజార్,సీతారామ కల్యాణం.

ఇష్టమయిన ఆహారం:- ఇల్లాలు చేసేదేదయినా, పనసపొట్టు కూర, పాటోళీ, మెంతి మజ్జిగ, చల్ల పులుసు.

ఇష్టమయిన పుస్తకం;-శ్రీ రామయణ,భారత, భాగవతాలు. శ్రీ పాదవారి వడ్లగింజలు, అనుభవాలూ-జ్ఞాపకాలూను, రావి శాస్త్రి మొత్తం రచనల సంపుటి చాలా పెద్దది నాలుగు వందలపైచిలుకు పేజీల పుస్తకం తెప్పించుకున్నా.

ఇష్టమయిన ప్రదేశం;- నాకు అమ్మ ఇచ్చిన స్వంత పొలం, అమ్మను చూసినట్లే ఉంటుంది.

జీవితం అంటే:- కష్ట సుఖాల కలనేత.

ఇతరులలో నచ్చేవి:- నిజం మాటాడటం.

సాహిత్యంతో మీ ప్రయాణం:- అసలు మొదలేలేదండీ!

మీరోల్ మోడల్:- శ్రీరాముడు.

తెనుగుభాషకు మీవంతు ప్రయత్నం:- ఒత్తులు పొల్లులు వదిలేయకుండా తప్పులు లేకుండా రాయడం చదవడానికి ప్రయత్నం, భాషని తప్పులు లేకుండా పలకడం :) నేను నిత్య విద్యార్ధిని.

నా బలం, బలహీనతా, మనవరాళ్ళే అయ్యారు. మీ అభిమానానికి కృతజ్ఞతలు తెలుపుకుంటున్నా.

మనవరాలు శ్రీవిద్య తీసిన తాత గారి ఫోటో




- లాస్య రామకృష్ణ 

Saturday 27 April 2013

లాస్య రామకృష్ణ తో మంజు గారి మదిలో మాట


మంజు గారు బ్లాగు మిత్రుల కోసం పంచుకున్న కొన్ని వివరాలు వారి మాటల్లోనే 



"పేరు మంజు యనమదల అండి పుట్టింది కృష్ణా జిల్లా దివి తాలుకా లోని జయపురం లొ జనవరి ఇరవై ఒకటిన . సొంత ఊరు నరసింహాపురం... ఇక ఇష్టమైన అలవాట్లు అంటారా చాలా ఉన్నాయి ...పుస్తకాలు, పాటలు వినడం, వంట చేయడం, ఇదిగో ఇలా కవితలు రాయడం.... ఇంకా చాలా ఉన్నాయిలెండి. 
 నచ్చిన రచయిత అంటే చాలా మంది వున్నారు యండమూరి, మాదిరెడ్డి, కొమ్మునాపల్లి, సూర్యదేవర, మధుబాబు, విజయలక్ష్మి మురళీధర్, చిట్టా సూర్య కుమారి, నిషిగంధ, కిరణ్ ప్రభ.... ఇలా లిస్టు పెద్దదే అండి... నచ్చిన రంగు నలుపు లేత పసుపు, నచ్చిన సినిమా ఒకటంటే కష్టం చాలా ఉన్నాయి నిరీక్షణ, అంకురం ఇలా వైవిధ్య భరితమైన కధలతో వచ్చే ప్రతి సినిమా ఇష్టమే. తిండి అంటారా ఏదైనా పర్లేదు కాకరకాయ వేపుడు ఇష్టం బాగా. నచ్చే ప్రదేశం అంటే ఆకాశం సముద్రం కలిసినట్లుండే చోటు...కన్యాకుమారి బాగా ఇష్టం ఇంకా చూడలేదు కాని ఎప్పటికైనా చూడాలి అన్నంత ఇష్టం.  జీవితం అంటే ఏం చెప్పను ఇంకా దాన్ని అర్ధం చేసుకునే ప్రయత్నం లోనే ఉన్నాను. ఇతరులలో నచ్చేవి అంటే ఏమో అందరు మంచివారే కాకపొతే పరిస్థితుల ప్రభావంతో మారిపోతూ ఉంటారు...ఎదుటి వారిలో తప్పులు చూడకుండా మంచిని చూసే లక్షణం బాగా ఇష్టం. ఇష్టమైన పుస్తకం అంటే విజయానికి ఐదు మెట్లు, లక్ష్యం,, గోరువెచ్చని సూరీడు....ఇంకా చాలా ఉన్నాయి.
చిన్నప్పటినుంచి ఇష్టంతో చదివిన పుస్తకాలు బోలెడు...వాటితో పాటుగా అమ్మమ్మ తిట్టినా...స్నేహితులు పోట్లాడినా...అలా రాయడం మొదలు పెట్టి...ఉత్తరాలతో పలకరింపులు....చిన్న చిన్న కవితలతో మొదలై ఏదో ఇలా బ్లాగులో నా ఆలోచనలను, అనుభూతులను, అనిపించిన దాన్ని రాయడం మొదలు పెట్టాను. నాన్నకి సాహిత్యంతో అనుబంధం... అమ్మకు ఈ రాతలు గీతలు అస్సలు ఇష్టం ఉండదు. చందమామ తో కాకుండా ముందుగా రాధాకృష్ణ సిరియల్ తో నా పుస్తక పఠనం మొదలు అది ఇది అని లేకుండా అన్ని చదివేస్తూ ఉంటాను ఇప్పటికి.  నాకు స్పూర్తి చక్కగా రాసే అందరు. ఇక తెలుగు భాషకు నా వంతు ప్రయత్నం అంటారా ఇదిగో చూస్తూనే ఉన్నారుగా....ఈ మమకారం పోకనే అమెరికాలో ఉన్నప్పుడు కూడా ఎక్కడ తెలుగు ఉందా అని వెదుక్కునేదాన్ని. ఇంజనీరింగ్ లో అయితే నన్ను అందరు తెలుగు పండితురాలు అనేవారు...ఎందుకంటే నా మొదటి ప్రశ్న " నీకు తెలుగు వచ్చా " అని... మరి మనకప్పుడు మరో భాష రాదాయే...నా పరభాషా స్నేహితులందరికీ తెలుగు నేర్పించేసాను నా ఇంజనీరింగ్ అయ్యేలోపల... ఇంకా ఏం చేయమంటారు చెప్పండి...-:) !!"  


బ్లాగు - కబుర్లు కాకరకాయలు 
http://naalonenu-manju.blogspot.in/

బహుమతి పొందిన మంజు గారి కవిత 

అసలైన ఉగాది....!!

 ఏవి ఆనాటి ఉగాది సౌరభాలు....?
కమ్మని వేప పూల సుగంధాలు 
పుల్లని మామిడి పిందెల కమ్మదనాలు 
పంచదార చెరుకు రసాలు 
షడ్రుచుల ఉగాది.... 
చక్కని జీవితాలు ఆనాడు...!!
పై పై మెరుగులు 
కల్తి సరుకులు 
గమ్మత్తైన మమకారాలు కలిపిన  
నటనే జీవితం ఈనాడు...!! 
భేషజాలు లేని మనసుల ఉగాది ఆనాడు...!!
భేషజాలతో కలగిపిన ఖరీదైన ఉగాది ఈనాడు....!!
పచ్చని తోరణాల పండువెన్నెల ఆనాడు.....!! 
పచ్చదనమే లేని కాన్వాసు రంగులు ఈనాడు....!!
ఏది ఆ మధుర కోయిల మత్తెక్కించే గానం...?
లేమావి చివురులు దొరక లేదని 
వెదికి వేసారి మూగబోయింది ఈనాడు...!!
మళ్ళి ఎప్పుడో అసలైన ఉగాది....!!

- లాస్య రామకృష్ణ 










Thursday 25 April 2013

త్వరలో "కష్టేఫలి" గారి ఇంటర్వ్యూ బ్లాగు లోకం లో

బ్లాగులోకం లో అతి త్వరలో 'కష్టేఫలి' గారి ఇంటర్వ్యూ 


- లాస్య రామకృష్ణ 

Saturday 20 April 2013

లాస్య రామకృష్ణ తో లక్ష్మీ రాఘవ గారి మదిలో మాట



నా పేరు -డా. కే.వి లక్ష్మి 

కలం పేరు -లక్ష్మి రాఘవ 

బ్లాగు - బామ్మగారి మాట 

మావూరు - కురబలకోట . చిత్తూరు జిల్లా ...పెరిగినది, చదువు , ఉద్యోగం అంతా  హైదరాబాదు లో ..రిటైర్మెంట్  తరువాత వెనక్కి మళ్ళి పల్లె జీవితం !

పుట్టిన తేదీ - 09-01-1948

హాబీస్ --మొదటగా ఒక ఆర్టిస్ట్ నాలో అనేక రకాలుగా వ్యక్తమై, వ్యర్తపదార్ధాలతొ అనేక ఆకృతులు చేసి కలకత్తా నగరంలో కూడా ఎక్ష్జిబిశన్ చేయటం ఒక మంచి అనుభూతి . ఈ నాటికి ఏది చూసినా చెయ్యాలనే ఉత్చాహం ..painting-watercolours,oil. pencil sketching , carving chalkpieces, blok printing on sarees ,fabric painting ...i have tried every possible art!

అభిమాన రచయిత- యుద్దనపూడి సులోచనారాణి .

నచ్చేరంగు -- మెరూన్.

నచ్చేసినిమా - ఎప్పటికీ మాయాబజార్ 

ఇష్టమైన ఆహారం -వెజిటేరియన్ 

ఇష్టమైన పుస్తకం - సెక్రెటరీ

ఇష్టమైన ప్రదేశం --మా వూరు

జీవితం అంటే --ఒక అవకాశం సద్వినియోగ పరచుకోవడానికి ..

ఇతరులలో నచ్చేవి -- నన్ను కించ పరచని వారు  

సాహిత్యం లో నా ప్రయాణం ---మొదటి కథ వచ్చింది 1966 లో ఆంధ్రపత్రికలో....మద్యలో చాలా గ్యాప్ తరువాత ఈమధ్య రెగ్యులర్గా రాయగలుగుతున్నాను 

నా  రోల్ మోడల్ - మా శ్రీ వారు డా. కామకోటి రాఘవరావు గారు . నన్ను మార్చింది , మలిచింది అన్నీ ఆయనే. 

తెలుగు భాషకు నావంతు ప్రయత్నం -- కథలద్వారా , బ్లాగు ద్వారా తెలుగు భాషకు దగ్గర అవటమేకాకుండా ఉడతా భక్తిగా దోహదపడుతున్నననే తృప్తి !

బహుమతి పొందిన లక్ష్మీ రాఘవ గారి ఉగాది కవిత 

ఉగాది 2013



ఆనాడు,
కొత్త చిగుళ్ళను తింటూ కోయిల ‘కు హూ ‘అని కూస్తూ వుంటే
ఆవు పేడతో ఇంటి ముందు అలికి ,రంగవల్లులు దిద్ది ,
పచ్చని మామిడి తోరణాలు కట్టి ,ఇరువైపులా వేపమండలు అలంకరించి ,
ఆముదంతో నాన్నమ్మ తో తలంటి౦చుకుని స్నానాలు చేసి ,
కొత్త పరికిణి ల రేపరేపలతో ,చేతులనిండా కొత్తగాజులు గలగలా అంటుంటే మురిసి,
పుల్లమామిడి ,వేపపువ్వు ,కోతబెల్లం తో తయారైన ఉదాది పచ్చడిని ఆస్వాదిస్తూ ,
స్నేహితులతో చెమ్మచెక్క ఆడిన అలనాటి జ్ఞాపకాలు ఎన్నో.........

ఈనాడు ,
ఆడపిల్ల నిర్భయంగా బయటికి పోలేక,
బాంబు పేలుళ్ళ తో బెంబేలెత్తి ,
నలుగురు ఒక చోట నిలబడటానికి భయపడుతూ ,
అవినీతి ఉప్పొంగి జైళ్ళ ను నింపుతూ వుంటే ,
కుళ్ళు వాసన వేస్తున్న ఉగాది పచ్చడిని ఎలా ఆస్వాదిస్తాం ?
విజయ ఉగాది ని ఆనందంగా  ఎలా ఆహ్వానిస్తాం ???????



- లాస్య రామకృష్ణ 

Friday 12 April 2013

పోటీ ఫలితాలు



బ్లాగ్ లోకం నిర్వహించిన ఉగాది కవితల పోటీకి వచ్చిన కవితలు అన్నీ వేటికవే ప్రత్యేకత కలిగినవి. కవితలు పంపించిన రచయిత(త్రి) ల కు అభినందనలు. 

ప్రముఖ రచయిత పి.వి.డి.యస్ ప్రకాష్ గారు న్యాయనిర్ణేతగా వ్యవహరించి విజేతలని ఎంపిక చేశారు. 

విజేతల వివరాలు 

ఉగాది డాట్ కాం            శ్రీ రామ్ నిహారి         మొదటి బహుమతి 

అసలైన ఉగాది              మంజు                    రెండో బహుమతి 

విజయ ఉగాది               లక్ష్మీ కామకోటి        మూడో బహుమతి 


విజేతలకు అభినందనలు 

తరువాతి టపా నుండి బహుమతి పొందిన కవితలతో పాటు పోటీ కి వచ్చిన కవితలు కూడా ప్రచురింపబడతాయి. 

ధన్యవాదములు 
లాస్య రామకృష్ణ 






రూ.500 /- కంటే తక్కువ బడ్జెట్ తో ఎక్స్పెన్సివ్ లుక్ ను అందించే హ్యాండ్ బ్యాగ్స్

మీ అవుట్ ఫిట్స్ తో పాటు మీ యాక్ససరీస్ కూడా మీ స్టైల్ ను పెంపొందించడంలో దోహదపడతాయి. యాక్ససరీస్ లో హ్యాండ్ బ్యాగ్స్ ముఖ్యమైన పాత్ర పోషిస్తాయ...